மதுரை தவெகவில் வெடிக்கும் அதிகாரப் போட்டி: கல்லாணை – கோபிசன் இடையே அதிகரிக்கும் மோதல்!
மதுரை தவெகவில் வெடிக்கும் அதிகாரப் போட்டி: கல்லாணை – கோபிசன் இடையே அதிகரிக்கும் மோதல்!
மதுரை நவ 7
மதுரையில் தமிழக வெற்றிக் கழகத்தின் உட்கட்சிப் பூசல் நாளுக்கு நாள் தீவிரமடைந்து வருவதாகக் கூறப்படுகிறது. தேர்தல் வெற்றியைத் தொடர்ந்து மாவட்டச் செயலாளர் பதவிகளைப் பெறுவதற்காக எம்எல்ஏக்கள் மற்றும் முக்கிய நிர்வாகிகள் மத்தியில் போட்டி அதிகரித்துள்ளது. குறிப்பாக, மதுரை தெற்கு மாவட்டச் செயலாளராகத் தொடரும் கல்லாணைக்கும், சட்டமன்ற உறுப்பினர் கோபிசனுக்கும் இடையே நிலவி வரும் அதிகாரப் போட்டி கட்சியினர் மத்தியில் பரபரப்பை ஏற்படுத்தியுள்ளது.
மதுரை மாவட்டத்தில் எம்எல்ஏ கோபிசனைத் தவிர மற்ற முக்கிய நிர்வாகிகள் மாவட்டச் செயலாளர் பொறுப்புகளை வகித்து வரும் நிலையில், தனக்கும் முக்கியப் பொறுப்பு வழங்க வேண்டும் என அவர் கட்சித் தலைமையிடம் தொடர்ந்து வலியுறுத்தி வந்ததாகக் கூறப்படுகிறது. ஆனால், இதுவரை தலைமை தரப்பிலிருந்து சாதகமான முடிவு கிடைக்காததால், அவரது ஆதரவாளர்கள் அடுத்தகட்ட அரசியல் வியூகங்களை வகுத்து வருவதாகத் தெரிகிறது.
இதற்கிடையே, தனது சட்டமன்றத் தொகுதிக்கு உட்பட்ட பகுதிகளில் ஆதரவு தளத்தை விரிவுபடுத்துவதுடன், பல்வேறு என்ஜிஓ அமைப்புகளைச் சேர்ந்தவர்களையும் தனது அணியில் இணைக்க கோபிசன் முயற்சி செய்து வருவதாகக் கூறப்படுகிறது. அதேசமயம், மாவட்டச் செயலாளர் கல்லாணையை நேரடியாக எதிர்ப்பது கட்சித் தலைமையின் கவனத்தை ஈர்க்கும் என்பதால், அதனைத் தவிர்த்து அமைச்சர் நிர்மல்குமாரின் ஆதரவு வட்டத்திற்குள் அவர் நகர்ந்து வருவதாகவும் கட்சியினர் மத்தியில் பேசப்படுகிறது.
கல்லாணை – கோபிசன் இடையேயான இந்த அதிகாரப் போட்டி மதுரை மாவட்டத்தில் தவெகவின் அமைப்பு ரீதியான ஒற்றுமை மற்றும் பலம் குறித்த கேள்விகளை எழுப்பியுள்ளது. இந்த உட்கட்சிப் பிரச்சினைக்கு கட்சித் தலைமை விரைவில் தீர்வு காணாவிட்டால், எதிர்காலத்தில் உள்ளூர் அரசியல் வளர்ச்சியும் கட்சியின் செயல்பாடுகளும் பாதிக்கப்படலாம் என அரசியல் நோக்கர்கள் கருதுகின்றனர்.
