தேனி அரசு மருத்துவக் கல்லூரி மருத்துவமனையில் கட்டணக் கழிப்பறை திடீர் மூடல்

தேனி அரசு மருத்துவக் கல்லூரி மருத்துவமனையில் கட்டணக் கழிப்பறை திடீர் மூடல்: புறநோயாளிகள், மாற்றுத்திறனாளிகள் பெரும் அவதி – உடனடியாக திறக்க மக்கள் அவசரக் கோரிக்கை!



தேனி அரசு மருத்துவக் கல்லூரி மருத்துவமனை வளாகத்தில் பொதுமக்கள் மற்றும் நோயாளிகளின் அடிப்படைத் தேவையாக இருந்துவந்த கட்டணக் கழிப்பறை திடீரென பூட்டப்பட்டதால், மருத்துவமனைக்கு வரும் ஆயிரக்கணக்கான மக்கள் கடும் சிரமத்திற்கு ஆளாகியுள்ளனர்.
தென் தமிழகத்தின் முக்கியமான மருத்துவ மையங்களில் ஒன்றாகத் திகழும் தேனி அரசு மருத்துவக் கல்லூரி மருத்துவமனைக்கு, நாள்தோறும் ஆயிரக்கணக்கான புறநோயாளிகள், முதியவர்கள், கர்ப்பிணித் தாய்மார்கள், சிறு குழந்தைகள், மாற்றுத்திறனாளிகள் மற்றும் பார்வையாளர்கள் வந்து செல்கின்றனர்.
அரசு விழாவைக் காரணம் காட்டி மூடல்:
மருத்துவமனை வளாகத்திற்குள் அமைந்துள்ள முக்கிய ரவுண்டானா பகுதிக்கு எதிரே, பொதுமக்கள் அதிகம் பயன்படுத்தி வந்த கட்டணக் கழிப்பறை செயல்பட்டு வந்தது. இந்நிலையில், அரசு விழா நடைபெறுவதைக் காரணம் காட்டி, எந்தவித மாற்று ஏற்பாடும் செய்யாமல் இக்கழிப்பறை திடீரென மூடப்பட்டுள்ளது. இதனால், இங்கு வரும் நோயாளிகளும் பொதுமக்களும் கழிப்பிட வசதியின்றி தவிக்கும் அவல நிலை ஏற்பட்டுள்ளது.
சுகாதாரச் சீர்கேடு – நோய் தொற்று அபாயம்
கழிப்பறை பூட்டப்பட்டதன் காரணமாக, வேறு வழியின்றி சிறு குழந்தைகள் மற்றும் பொதுமக்கள் திறந்தவெளியிலும் சாலை ஓரங்களிலும் இயற்கை உபாதைகளைக் கழிக்கும் சூழல் உருவாகியுள்ளது. இதனால் மருத்துவமனை வளாகத்தைச் சுற்றிலும் கடும் துர்நாற்றம் வீசுவதுடன், சுற்றுப்புறத் தூய்மை பெரிதும் பாதிக்கப்பட்டு காற்று மாசுபட்டு வருகிறது. மருத்துவமனை வளாகத்திலேயே சுகாதாரச் சீர்கேடு நிலவுவது, காற்றில் கிருமிகள் பரவி புதிய நோய் தொற்றுகள் உருவாகும் பேராபத்தை ஏற்படுத்தியுள்ளது.
பொதுமக்கள் மற்றும் சமூக ஆர்வலர்களின் கோரிக்கை:
இதுகுறித்து புறநோயாளிகள், சமூக ஆர்வலர்கள் மற்றும் மாற்றுத்திறனாளிகள் வேதனையுடன் தெரிவிக்கையில், "மருத்துவமனைக்கு வரும் ஏழை, எளிய மக்களின் அடிப்படை மனித உரிமையான சுகாதார வசதியைப் பறிப்பது ஏற்புடையதல்ல. எனவே, மாவட்ட நிர்வாகமும், துறை சார்ந்த உயர் அதிகாரிகளும், மருத்துவமனை நிர்வாகமும் உடனடியாகத் தலையிட்டு, பூட்டப்பட்டுள்ள கழிப்பறையை பொதுமக்கள் பயன்பாட்டிற்குத் திறக்க அவசர நடவடிக்கை எடுக்க வேண்டும்" என வலியுறுத்தியுள்ளனர்.